Tedim

MAILAM AH ZOMITE KIPUMKHATNA TAWH KHANTOH NADING

Tungg Thang

Leitung ah minam khat mah dingin Pasian in hong bawl ahi Zomite pen kithehthang loin, kigawm kik a mapang khawm in i sep khop ding hun hong cing ta hi. Kum zalom 21 sungah i lut taktak teh hih thupen a ngaihsut huai mahmah hong hita hi. Minam dang mimal tam khin ahi India leh Sen te bang hilo in a mimal in lakh 4 khawng bek apha Zomite pen i kikhenkhak ding dahhuai mahmah hi. Tua hi in Zomi khat pen i khahsuah ding, i nuaksak khak ding, i lausak khak ding kidophuai mahmah hi.

Zomite’ Thu:

Zomite pen mi mawkmawk hilo in Pasian in hong teel minam khat i hihi. Bang hang hiam cih leh Missionary te in a mual a guam leh gam tampi kantan in Zomite omna mun leihoihlo gam ah hong paito uhhi. Hih pen Pasian in a kilanglo in a gelna khat hikei leh Zogam hong tun nading thu tam omlo hi. Tua hi in Zomite pen Pasian in hong nawl khin hideklo in hong zon minam khat sungah a kihelte ihihi. Tua hi in Zomi hihna ah kiphatsak nading thu lah omlo in, kineusak nading thu zong omtuanlo hi. Pasian hang bek in kiphasak in, kiniam khiat ni. Zomite tha neemna pen kan lehang mi dangte pahtawi ding haksa a sate ihihi. Hazatna lam kitam neihzaw in deihsakna kineizo meello hi. Hih hazatna nusia in deihsakna leh pahtawina tawh mapang thei lehang i khantohna dingin hong ngak gige cih kigal muh thei hi. Zomite sungah a kisam pen in itna leh deihsakna mah hipen hi.

Zomite Hun Thum

Leitung ah hun paipi thum om a, tuate pen, a beisa (past), tuhun (present) leh mailam hun (future) te ahihi. Zomite’ sungah zong hih hun thumte lungngaihhuai hi. A beisa in bang teng piang a, Zomite bangci ahiam cih ngaihsun dih ni.

A beisa hun pen thumuh hun leh kikhen hun ahihi. Thu kimu tek in hoih isak na peuh ah kitai kawikawi hi. Khat guak a tangtat zong i om a, a hon tat zong i om hi. Mi hau zong na om in, mipil zong na om uhhi. A hih hang a ngaihsut huai ah Zomi mihau masate tun koi lai tungta? Bangci ta? cih khuangaihhuai hi. Bang hang in Zomite’ hauhna pilnate kizomlo a hiam? A hau omlo maw? a pil omlo maw? ci lehang lah a om mah ahihi. Mi khat lekhat ikikhen mah bangin i biakna i kalsuanna te ah kigawmtuah ding i ngaihsun khakei hi. Tua bangin ma i nawt a hih ciang i tungto hi. A beisa hun ah bang nusiat huai a bang pen mailam ah ken suk huai ahiam. Thu khat ah a beisa hun in i pu ipate na citak mahmah uh un tua tungtawn in min na ngah mahmah uhhi. Hih cihtakna pen nusiat khak loh ding thupi hi. Cihtakna pen mailam hun dongah keng suak ni.

Tu hun pen Khantoh hun leh kipumkhat hun ahihi. Kipum khat in kithutuahna tawh na i sepkhop ding lunggulh huai mahmah hi. Hih hun pen kum 2015 ciang target in nei lehang hoih ding hi. Kipum khat natawh khantoh ding tumh lehang kua mah in hong dal/kham zolo ding hi. Tua hi in kipum khat nading lampi zong dih ni. Koi lampi zui lehang kipum khatna hong om ding ahihiam cih kan huai mahmah hi. Kei’ ngaihsut in ah deihsakna leh itna tawh thuakzawhna a kisam dingin ka tel hi. Minam tawm lai te ihih manin a kihuaii diamdiam lai ding mite i hihi.

Mailam hun pen Pasian leh Minam adingin sep hun dingin ka geel hi. Pasian in Zomi in hong piansak a lungkimlo cih peuh omthei mawkmawk hi. Hih thupen lungkimloh theih leh nial theih ahikei hi. Ngaihsun pha a san siam ding ahihi. Zomi ihihna pen ei’ teel hilo hi. I luahsuk ahihi. Tua hi a bang ci lehang mailam ah khangto semsem thei ding i hiam cih i zon ding kisamh ding hi. Minam abawl leh a piangsak pen Pasian ahihi. Tua ahih manin ei zong Zomi in hong piansakna ahang khat a om gige ahihi. Mailam ah i nuntak pih ding thu in itna tawh Pasian leh Minamte ading in sep ding kisam mahmah ding hi.

Zomite’ Pianzia

Zomite pen a pil, a siam mawhlo minam khat i hihi. Ahih hang in Zomite pianzia khat in a kihuai diamdiam minamte kihi khalo citciatse hi. Tua manin i khantoh zah ding leh i matut zah dingin i hizo kei hi. A beisa Zomite thu tawm khat lungngaih kik huai hi. Zomi pen a pil, a siam, a nei a lam na om khinzo hi. Ahih hangin tua thute a kigui zuih hiam cih ngaihsut phat huai mahmah hi. Pilna, siamna, hauhna, liatna cihte khang khat bek a khom tawh i kibang hi. Sen (Chinese) te a khantoh mahmahna pen kihuh in kipantah siam uhhi. Ei mite pen kihuh in kipattah ding haksa asa ki-omlai hi. Tua hi in kikoici pattah in, kihu in kidom ding ihi hiam cih kanto den ni. Bangin i thupha a kiguizuih ding hong kham ahi hiam? Khat om hikha ding hi. Kihazatna, leh midang thusimlo in neu muhna cihte pen i pu ipate’ sungah hong kizom suksuk thu khat ahihi. Tu in hih thute bang cih ding ihi hiam? Mai lam ah ikipawl theih semsem nadingin nusiat kul ding hi. Vaphualte’ ki-itnate keng ding hihang. Tang tatnate nusia in kipawl khop theihna lamah manawt ding hihang. Thumaan leh lam maan zong ding hihang. Thu maanlo pen sawtpi kikhomlo thei ahih manin sawtpi a kimangthei thumaan lampi zong in tot sawm dih ni.

Lamthak Zon Huai

I khantohna ding leh i kipawl theih diamdiam nadingin lam thak zong ni. Ki-el kido nate nusia in ki-it, kipahtawina lamah ma i nawt kul tading hi. A beisa hun in Zomite kithu hilhnate in lausak in theihsakna lam ahi a, tu hun ciang in leitung bup in a zat kithuhilh zia pen lawpsak lunglutsak in thuhilhna lam hita hi. Mi a khangto te in kitai ngakngak cihte na tamzat nawnlo in thudam tawh, deihsakna tawh hilh zawta uh hi. Tu hun ciangin hilh ngakngak cih zong tam nawnlo a, lak in, makaih cih lam kizangh ta hi. Tua hi in hih thute pen i minamte sungah a zat huai mahmah ding thu khat ahihi. ‘Siam kei tak ciai’ cih kammal sangin ‘tawm hah kat lai o,’ cihte pawl dan kammal zat siam ding zong hong kisam ta hi. I Zomite sungah zong pilna leh siamnate kikhai lua mahmah lai hihang. A siamte’ pilna saang mahmah napi in tua a zuizo ding mipi kitawm lai hi. Zomite pen a pillo, a siamlo hilo in a mong a mukha nailo pawl khat i om man bek ahihi. Tua a mong, a bulpi mu peuh lehang mi a ban ding vive te ihihi.

Thu khupna

Tua ahih manin ei Zomite i ki-it diamdiam theihna ding lampi thak zong ciat ni. A beisa hun a i neih nailoh ahoih thupawl khat zat sawm ni. A beisa hun a i zat thu hoihlo pawl khat sit khia in nusia ni. Itna leh deihsakna tawh Zomite adingin ma i pan nakleh ZOMITE HAN LUNG CIAM KHANGTO DIAM cih hong maan tading hi. A pahtawi huai te pahtawi siam in, a makaih huaite makaih siam in veina leh thuakzawhna, deihsakna tawh ma pang peuh lehang itna a zozo ding thusia omlo hi. Itna in na khempeuh zozo hi. Hong lungkiasakthei kammalte pelh in tha hong piathei kammalte tawh i kizop diamdiam ding thupi pen hi. I kicinlahna te kikawk bawllo zaw in i siam na sun a omleh tha kipiak sawm ni. Siatmuhna (Pessimistic view) nusia in Hoihmuhna (Optimistic view) tawh kalsuan lehang ki-itna hong khangin, kimuhdahna in mun ngah nawnlo ding hi. Tua hi in a khak bel in kipumkhat nading leh khantoh nadingin ki-itna thu kipaih/kikhak ciatni Zomi uleh naute aw. Lai Siangtho in zong gen hi, ki-itna pen a tawntung a kip ding ahihi, na dangte a kiploh hangin (1Cor. 13). Tua hi a a tawntung a kimang ding itna khaici vawhin ciing ni.

17-10-07

KHANGTHAK KHUADO PAWI

Tungg Thang

K - Khuado pawi kum khen pawi

I neulai a i zak ngei thu in tuni dong i beng kha ah i zaza lai hi. Khuado kha hong tun taktak ciangin Zomite ki-om mawk theilo in bawl loh aphamawh ahi Khuado Pawi pen i omna muntek ah i bawl ciat hi. Hih Khuado Pawi pen Zomite adingin a thupi mahmah pawi lianpi khat ahih manin bawl loh a phamawh leh a khiatna nei, a manh nei mahmah khat ahihi. Tua hi a khua ido ciangin Khuado pawi in hong gennop/piaknop thu in bang hi ding a hiam cih kan in ngaihsut ding kisam ding hi. Mi pawl khat in Khuado pawi pen kum khen pawi, nekna dawnna hun, gualnop lamna hun in ngaihsun kha bek uh hi. Ahih hangin Khuado Pawi in i muh banloh thuthuk tampi neilai dingin ka um hi. Tua hi in Khuado Pawi ii hong gennop thu pawl khat en ni. Khanglui lai a khuado Pawi leh tuhun a khuado pawite kilamdang mahmah ta hi.

Khanglui lai in Pasian cih lian a kibiakma in Zulehsa tawh khuado pawi nasiatak in a kibawl ahihi. Tua hi in tu hun ciangin Pasian a kithei khinta ahih manin i khuado pawi koi ci bawl in bangci zat cih i lungngaih kik dingin thupi ding hi.

Kammal ii A Khiatna

Khuado (gelhdan) = khawdo (simdan) i khua in do gige khat nei hi. Kua teng bangteng do ahitam? Tua banah “Khua” i cih in i teenna khua bek hilo in “a vanglian khat” a gennopna in zong kizangh hi. Hih lai ah Do cih in khiatna nih nei hi:

1. Khuasia Dona (Gal leh sa bangin do)

2. Khuasiam Dona (Zin leh leeng bangin do) cihte a hihi.

1. Khuasia Dona

Khuado i cih ciangin amasa pen in i khua i tui in siatna namkim hong tun a, hong gimsak, hong nasak, hong bawlsia khuasia ahi dawi leh kaute dona ahihi. Tua hi in Khuado pawi hunsungin a hoihlo na khempeuh inn sung, khua leh tui sung panin hawl khiatna leh dona in a kizangh ahihi. Nidangin ahih leh bum leh ai, kau cihte tam mahmah a, tuate nasiatak in tuga, heiga tawh innkhuam teng sat kawi kawi in nasia tak in muh mawh dawi leh kau te a kihawl khia ngiatngiat ahihi.

2. Khuasiam Dona

A nihna ah khuado i cih in i khua leh i tui hong siam thei ahi, Khuasiam zin bangin nasiatak in dawn a dona ahihi. I khua i tui thupha hong pia thei ding in khuasiam tungah ngetna a kinei ahihi. I khua i tui cidam nading, hauhna ding, mapai nading cih bangin ngimna tawh khua a kido ahihi. Khuado ni in an leh tui a lim pen a kine ahih mahbangin an lim tui lim tawh khuasiam a do ihihi. Tua hi in i khuasiam (Pasian) i neih lakpan a hoih pen, a lianpen tawh i zindo ding ahihi.

Khuado Pawi tawh kisai Pawl Khat

Nidang a i pu ipate’ bangin tuni in Khuado pawi pen bucing takin kibawlzo nawnlo hi. Banghang hiam cihaleh khuahun kiheizia leh a mun amual kibat lohna hang ahihi. A diakdiakin zaang gam bangah Taangsuahna bang a kibawl thei ding hi peuhmah lo a, Zogam a kibawl thei ding bek ahihi. Tua banah ngaihsutna zong kidang ta hi. Khuado ciang a kisem pawl khat en ni:

Lam hahna (Dawi ciah ciang a tot nading)
Khuailakna/Taangsuahna (Ai sanna ding)
Khuai pheeng tawh aisanna (Siampite sep)
Dawi leh kau hawlna (Inn lusi’ sep)
Zu ne in Phitmut in laamna (lasa kawm)
Dawi biakna tungman sial khahna (Inn khat in khat)
Siampite phuisamna (Thupha ngetna)
An nekkhopna (Innkuan kim Itna an)

Khang lui lai a kizangh sepleh bawl pawl khat pen tu hun in kizangh thei nawnlo ahih manin pawl khat i nusiat kul ding hi. A kizangh theilo leh a lemlote cihna hi. I ngeina a neng a tawng in zuih ding sangin tuhun ah a thu leh a khiatna hong thupi zaw ding hi. Pawl khat leuleu pen kizangh theisuak ding ahih man in i kepcing ding thupi mahmah ding hi. Khangthak Khuado Pawi pen tu lai a, a laang mahmah ahi Khua Siansuahna tawh a pianzia kinai mahmah hi. Thu dang khat in gen lheng, Khangthak Khuado Pawi pen Khua siansuahna leh Ei mahmah kisiansuah nading lim khat hong lak na hi gige hi. Khuado la (zola) te zong sak theih dingin sin dingin hoih thei mahmah hi.

Thu Khupna

Rev. ST. Hau Go in a gelh ngei mah na ah “A lui nate sia kim lo a, a thak nate zong hoih kimlo hi” a cih a maan ahihi. Zongeina khanglui lai hun a te en kik lheng a hoihlo pawl khat a om hangin a thupi mahmah tampi mah na om hi. Tua hi a Khuado Pawi pan i ngeina sungah a thupi mahmah leh a manpha mahmah khat ahihi. Tulai khangthak te in a nusiathuai leh a zuihlai huaite khensiam in Khuado Pawi bawl ciat ni. Tua hi in tulai khangthakte in hih khuado pawi i bawl ding pen a kisam mahmah ahihi. Mimal mahmah kisiansuahna a kisapna zong hong lak lai hi. Tua hi a khangthak te’n khuado pawi i bawl ciang i mangngilh lo in i sep ding thu te in: 1. Lam hahna, 2. Khuasia do in hawl khiatna 3. Khuasiam (Pasian) dawn in zin dona leh 4. Ki-itna an kuang um in nekkhopnate ihih ding kisam mahmah hi. Tua hi in Khuado Pawi bawlna a tunga teng sepna tungtawn in Topa’n mavan, daupaina hong pia in khiatna kician mahmah a nei ding ahihi.

A Hoih Mahmah Leh A Hoih Vetlo AIDS (Thu khat in Khiatna Nih Neithei)

Tungg Thang

Tu hun ciangin leitung khuahun kihei zia zui in nuntakna zong hong haksa mahmah ta hi. Tua nuntak zia haksatna tungtawn in mite in koi mun pan in huhna kingah thei ding cih kikhuadak kawikawi ta hi. Bang sem in, bang bawl in hi lehang nuntakna ah noptuamna, khuasakna nuamtuam ding cih pen leitung khempeuh ah a kilunggulh mahmah ahihi. Tuate lakah Zomite zong kihel in koi lam tawn leng mavang ding cih bekbek ngaihsun in kikhuadakdak hi. Tu hi in mi khat in nang zong AIDS na deih hia? Hong ci leh thu nih i ngaihsutna ah hong lutpah ding hi. Hih laiah mikaang lai ahi khiatna nih a nei AIDS thu tawm en dih ni. Tua hi in hih laimal in khiatna hoih mahmah khat leh khiatna hoih hetlo khat a nei ahih lam imu thei hi.

A Khiatna:

1. AIDS = Huhna, panpihna (AID a tamzaw in kiyang)

2. AIDS = Natna lauhuai pen (Acquired Immune Deficiency Syndrome)

1. AIDS

Hih pen na deih hia? Hong kici leh, “Deih mah” cih ziau ding hi mai hi. Leitung ah mihing a piang peuhmahte a deihlo om khollo kha ding hi. A diakdiak in gamdang pan in huhna pen ei gam sungpan a huhna te sangin tam zaw ahih manin gamdang huhna pen a kilunggulh tek a hihi. UNICEF, UNDP, UNO, etc. cih tepawl in huhna lianpipi pia khia zo uhhi. Tu laitak bangin UN in a diakdiak in Refugeete huhna a piak laitak hi a, hih huhna ngah nadingin mundang gamdang dongah kidelh in kipai ngeingai hi. Hih zong pen AIDS lian mahmah khat ahihi. Tua bek thamlo in Ministries leh Organization a tuamtuamte in zong huhna nasia tak in piakhia uh hi. AIDS na ngah hia? Hong kici leh, tha khat in kidawng thei pahlo hi. Thu i dot masak kul ding hi. AIDS na cih pen HUHNA maw? NATNA? ci-in dong masa hamtang ding hihang. AIDS na nei hia? Hong kici leh “Nei keng” ci-in kitel ziau lel hi. Hih mun ah NGAH cihin khiatna nih mah nei in, nei cih pen kitel thei hi. Ngah cih ciangin huhna ngah zong hithei in, natna ngah cih zong hithei veve hi.

2. AIDS

Hih pen na deih hia? Hong kici leh, “Deih keng” ci a i dawn ding ahi hi. Bang hangin a masa pen deih in tu a ciang deihlo ihiam? Hih ii a khiatna pen natna teng lakpan a kikihta pen ahih manin kua mah in deihlo hihang. Tu hun ciangin AIDS natna pen a kikal ah dot(.) kikoihlo ahih manin a tunga huhna cihtawh a kitel khial thei ding ahihi. A kimuh cil hun ahi 1980s pawlin A.I.D.S. ci-in kigelh tangtangh a tun dot (.) kikoih nawnlo hi. Hih AIDS pen pasal in numei pia thei in numei in zong pasal pia thei hi. Tua banah pasal in pasal, numei in numei cih zong piathei lailai hi. Pasian in natna lauhuai pen ahi AIDS pen mite ii lunggulh mahmah ahi nopsakna sungah koihsim khilkhialse hi. Tua hi in hih AIDS natna pen sum, huhna a lamen luate in zong ngahthei mawhlo hi cih i gen nopna ahihi. Gentehna, Mi khat in sum tawh zol masa in natna kilawh thei mawk hi.

3. AIDS Khentelna

Tu hun ciangin AIDS pen khen haksa mahmah ta hi. Ngimna tuamtuam tawh AIDS a pia peuh om mawkmawk hi. AIDS ngah ci kha zenzen lehang “huhna” maw? “natna” cih kitellianlo hi. Tua hi in mi khat in hong piak ding pen a nih in zong hithei hi. Mi khat tung pan in a nih in zong a kingah thei thu a hihi. Tua hi in AIDS i cih ciangin a nungzui nei leh a nungzui neilo om hi cih theihhuai hi. Mun khat panin mi khat peuh in AIDS (huhna) hong piapia in a tawpna ah AIDS (natna) zong hong piak khak ding sitphat huai mahmah ding hi.

Tu hun ciangin mi pawl khat in AIDS (natna) a piaknop man in AIDS (huhna) a pia masa peuh om thei hi. Tua ahih manin AIDS khempeuh pen san pahpah ding hilo in a sittel huai ding thu hong hita hi. A deihhuai mahmah leh a lunggulh huai mahmah AIDS ii a nungzui natna hong pai khak ding kidophuai mahmah ding hi.

Thu Khupna

I gensa bang in AIDS khempeuh pen a lunggulhhuai masa hilo mawk hi. Bang hanghiam cihleh bang hang a kingah cihleh bang ngimna tawh hong kipia cih thu nih om kha ding ahih man ahihi. A hihhangin Pasian kiangpan hong pai a Pasian itna takpi tawh hong kipia zong om ding ahih manin khentel theih ding thupi masa ding hi. Ahoih na khat in zong a hoihlo nungzui a nei thei ahih lam i theihkholh kul ding hi. AIDS leh AIDS pen thu khat pan in en lehang a kikhen theilo thu tawh kibang hi. Tua mah bang in khenlo in hong pia a om khak ding patauhhuai hi cih igen nopna ahihi. Mi pawl khat in huhna leh sum lunggulh lua ahih manin a nuntakna a siatlawh tampi om mawk hi. Hih bang huhna leh sum lunggulh luatna pen zong mawhna lian mahmah khat ahih lam i phawk theih ding ikideihsak man ahihi. A deihlo leh a lunggulh lo bel mihing ahihnak leh omlo ding hi. Ahih hangin tuabek lungsim ah i vom khak loh ding thupi ding hi. Tua hi in a deihhuai pen leh a lunggulh huai pen icih AIDS pen hong paipai leh a tawpna ah a deihhuailo pen leh a huathuai pen ahih meel zong kigenthei nailo hi. Tua hi in bangbang ahizong in lunggulh luatnate uangsaklo in a hoih bek khat tawh inuntak theih ding kideihsak pen hihang.

ZI LEH PASAL NEI NAILOTE ADING:

Lai Siangtho Siksan A Etna

Tungg Thang

Thu Masa

Mite thu a kihilh uh ciangin a nu apa in mailam ah a tate nuntakzia ding ngim kholin thu a kihilh ahi uhhi. Nulepa te in zong mailam ah atate uh bangci leh deih ahiam cih a ngaihsutna hoihpen uh suah khia in thu hilh uhhi. Tua hi a, nulepa in a patauh penpen uh thu in a tate uh’ zi leh pasal ding kua ahi mawk tam? cih ahihi. Nulepa omloh nungah bang ci-in khang a kizom dinghiam cihpen nulepate’ lunghihmawhna khat ahihi.

Lai Siangtho sung en lehang (Piancilna), Abram pen minamte’ pupi dingin Pasian in a omna gam panin na samkhia hi. Minamte pu dingin kong bawl ding aci Pasian ahihi. Tua ahih manin Pasian pen Minam a vei, minam a pan masa ahihna kimuthei hi. Tua hi in Pasian in Zomi nam a hong bawl pen a hipak cih hilo in Pasian in geelna khat anei gige ahih lam i phawk ding thupi hi. Mailam ah Zomite pen Minampi khat suak in Pasian in tawisaang ding ahih manin i ngaihsut tohtoh dinga ka geelna pawl khat zong kihel hi. A diakdiak in teel ding mi nih a neite in saikak theih ding ideihna ahihi. Tel ding a neilo te lah cih theih hikei.

Minam Pih banghang Tenpih ding?

Piancilna Lai Siangtho sungah Abraham in a tapa Isaac adingin zi a zon ding ciangin a nasem pa kiangah ka mipihte lakah va zongin ci citciatse hi. Banghang in a mipihte sungah zongsak ahitam? Ngaihsuthuai mahmah hi. Minam khat ii makai dingin Pasian in mi a teel ciangin mi mawkmawk na teello se hi. Minam khat ii suante na teel phadiak hi. Banghang ahi diam?

Minam khat ii makai dingin na suan na khakte na lunggulh a leh minampih zi leh pasal nei lecin a dan khat hong om ding hi. Minamdang zi leh pasal aneite’ suante pen hoih deuh in pil deuh kici se hi. A maanna ciang om ding hi. Ahih hang a pilzaw a siam zaw phial zongin minam dang tawh a kihelte Pasian in Lutang leh Makai in na tam koihlo hi. Minam khat ii suante pen a pilkei zawk hang Lutang leh Makai in hong omzaw ding hi. Tua pen Pasian ii sepzia, minam a vei zia khat hi in ka um hi.

Minam khat hihna ah i ngeina leh zia leh tongte kithei khin i hih manin it a kep ding pen genhak nawnlo hi. A ngaihsun thei Zomi numei khat in tuate it in kem cing theipah ding hi. I ngeina, i lai, i thu leh la, leh zia leh tongte i cih pen in mailam ah minam lian a hong suaksak zo ding thu hipan hi.

Minam Nih ii Suante

Lai Siangtho thak ah a kithei kimpen minam in Samaritante ahihi. Minam nih kihel suanlekhakte ahih manin Judah mite in thu in a seh loh, zong a hopih noploh minamte ahihi. Bang hang a neu muh cih pen i gen theih lianloh hang lungsim picing thu ngaihsun te in a mipihte mah teel hi cih hileh kilawm hi. Jacob leh a tate in zong a tanu pen midangte zi dingin phal hetlo hi. A tawpna ah a tanu a khialhpih midangpa pen that lum liang uhhi. Amau leh amau minam khat a kithupitsak dan uh i gennopna ahihi.

Zomite zong minam tuamdang mahmah khat ahihi. Pilthei in, zong hoih in, hauthei lai uh hi. Pecent in tuat lehang a pillo cihpen tawmkha bek hiding hi. Khanglui lungsim in hong zawh lai mana a pillo tawh a kibang pawlkhat a ombek ahihi. Zomite thanemna khat bel kipawlkhop theihlohna leh kithupisak lohna hi citciatse hi.

Minam Dang Zi Neite Bangci

A diakdiak in minamdang pasal neite sangin zinei pen nawngkai zaw hi. Banghang hiam cihleh Zomite pen beh leh phung pen pasal tungtawn in a kisim ahih mah bangin, innluah zong pasal upate hipha diak hi. Gentehna in pasal khat in minam dang zi hong nei in kum tampi dam suak leh bwaihuailo hi. Ahi zong in hong si baih leh pen nawngkai mahmah hi. Gtn. Tua pa pen a cithei khat hilai leh a neihsa pen a zi in luak mangin a teekte zong don nawnlo thei hi. Tua ban ah kumpi nasem hi in luangman kipia ding hileh a nu apa in a tapa’ luangman ngah kha nawnlo in a zi in humcip thei hi. Hih pianzia pen a tamzaw a i genna hi a, a langkhat ah ahoih/dik mahmah midang zi zong om veve hi (tawm mahmah hi.) Midang zi nei te a zi pen a thusiam mahmah kei leh a sanggamte in sungkhat in ngaihsut zawh ding hamsa hi. Thu khat ah, i minam pih zi leh pasal zong minam dangte sangin athupi lozaw zong om veve zel hi. Ka gennop ah imipih bek hoih hi cihna hilo in mailam adingin ka geel kholhna leh muhkholhna hizaw hi.

Thu Khupna

“A minam a nawlkhinte Pasian in nawlkhin ding a, a minam a itte Pasian in it in tawisaang ding hi.”

I minam pen a thupi mahmah khat ahihi. Isaiah Lai Siangtho sungah nang hong kieukhiatna suang mangngilh kei in ci-in kigelh hi. Bangbang i suak zongin hih thu i mangngilh loh dingin Topa in deih hi. Tu hun ciangin ecumenical movement pen nasia mahmah ahih manin hih ei mi bek cih thu tawh tawm hong kileh ngat pian hi. Midangte ngailo ding teenpih loding cilo hihang. I minam ii mailam ding khual khawm tek ni ka cih nopna hizaw hi. Minam, mimal in a tam nailo ihih manin mimal mahmah khangto in tampi phak ding zong thupi mahmah hi.

A tawpna ah gen lehang, mihing te a geel bek hi in ingaihsutna leh itupna a gen bek ihihi. Ahi zongin Pasian in hong geelsakna khat zong na om zaw thei ding ahih manin ei cih theih lian a om hi kei. Teel khuan a nei laite teel ding aneite ading a igenna bek hi. Mihingte gawm zong kiplo thei a, Pasian ii gawm mah ngah ding a thupi zaw hizel. Mihing’ gawm pen kikhen kik thei a, Pasian’ gawm pen kikhen zolo hi. Tu hun khangno te in minam dangte lunglut pha diakse hi. Tua hi in nulepa in kua tawh hong deihsak tam cih zong a ngaihsut huai veve ahihi. Nulepa zong mailam ah a tute tawh Zopau in a kiho theihloh ding uh patau veve uhhi. I hialna dingin ah, kua kua tawh ikiteeng zongin iminam nawlkhin khalo in nusia khalo ding icih nopna bulpi hipen hi. Topa’n a ngaihsut siam dingin thupha hong pia hen.

Hun Zui in Nate Kihei

Tungg Thang

Thu Masa

I tung sunni pen ziingsang nai 6:30 pawl in nisuahna lampan in hong suak ciaiciai a, sun nai 12 hun laitak pawl pen a sat hun pawl hi in, nitak nai 5 pawl in nitumna lam zuan in hong tumsuk diaidiai hi. Tua khit ciangin khua hong zing in ihmu in itawlnga a nikhat in hong liamsan ahita hi. Tua mah bangin a zing ciangin ni hong suak zel in hunte nai khat khit nai khat, ni khat khit ni khat in hong bei toto ta hi. Mi hingte a khang cing kuan te pen a khan lam uh kithei khollo in a khang khang hi gige hi. Naupang te ahih leh ni khat khit ni khat a khanna uh kilangh mahmah hi. Tua hi in nau pang khat ulian a suah dong en ni ci lehang gen ding tam mahmah ding hi. Tua hi a hun icih pen mihingte uk zawh loh in a paipai ahih mah bangin, nate zong hun zui mah in na kihei toto hi.

Ngeina Kihei

A diakdiak in tu hun ciangin khanglui thu gen lehang a zanuam kitam khollo hi. Tu hun a mawtaw tawh sang akah te a pi apu te’n ko hun lai in khe tawh a kikah tanghtang hi a, hampha tak uhciai ci kha ding hi. Hih thu pen a lamdang a bat teei hang a hun zui in a kihei thu ahihi. Yangon ah teeng in mawtaw tuanglo in khe tawh sang kah in kici leh a lamdangpi khat hong hi ding hi. Ngeina bangin a kilaih theilo thute nangawn tawmtawm kihei veve hi. Khuado pawi bang thupi isa mahmah a, ahih hangin nidang ate bawl bangin ibawlzo nawn kei hi. Hih pen hun ii huzap mah ahihi. Ngeina hoih te pen ikep cing ding a thupi mahmah ahihi. Sanggam Laipian/Siangsawn te bangin ingeina pen hong lamtoto in ngeina lam in hong laam ciang bang muh nop mahmah phial hi. Ahiang nidang lai a te om lai leh hih pen ingeina hilo hi ci ding hi. Hih sanggam Laipiante hong sepna uhpen thupi kei zong kici thei tuanlo hi. Zo ngeina ci-in TV bangah a pai ciangin sanggam laipiante vive hong laam uh a thupi mahmah hi. Hih pen ingeina hikei ci-in va khaktan zolo ding hihang. Bang hang hiam cih leh a hunzui a kihei laam ahihi.

Pau leh La Kihei

Nidang in Tedim pau cih a om hilo in Dr. Khen Za Sian’ gen mahbang in (Zolus Journal 11) Tedim pau zong hong piangtawm pau ahihi. Pawl khatte’n hih thu theilo in a ki-Tedimsak mahmah bang om zen hi. Minam tuamtuam pau nam tuamtuam a kigawmteh tu a Tedim pau hong piang khia ahihi. Pau nangawn zong itheihloh kaal in ahun zui in a kilaih suksuk mah ahihi. La zong tua bang mah in sanggam Laipiante’n hong puah in Guitar tawh hong thuahta uh hi. Nidang a Zola tawh a kibang nawnlo hong tamta hi. Nidangin Zola pen khuang leh sialki bek tawh a kithuah hi a, tuhun ciangin Guitar zong tawh kithuahta hi. Hih te khempeuh zong a hun zui a kihei na mah ahihi. I Zolai a bawl khia pa pen Rev. JH. Cope hi a, ama gelh dang pen tu ni ciang dong kizang saamlo in tawmtawm in kihei hiamhiam ta hi.

Pasian Kihei

Pasian na ngawn ahun zui in a kihei mah ahihi. Leitung piancil lai hun in mite in Pasian na kihta mahmah uhhi. A min zong na lo ngamlo uh a, a min hem bek in na gen uhhi. To thum Pasian (Trinity) mahmah en lehang, a masa in Pasian (Pa hun-Thukham hun) cih bek a kithei hi in, tua hun lai a Pasian’ thupiakte mihing te in zui zolo mawk ahih ciangin Pasian in lam khat hong hong hi. Tua hi in hunkhat ciangin Pasian takpi mi bang in hong piang tazen hi (Tapa Zeisu hun-hehpihna hun). Topa Zeisu hong pai lai in ama hehpihna a ngah kha mi tawmkha bek om in leitung hong zelh zolo hi. Topa Zeisu zong ama’ hun lai in Galilee kiim bek ah kileh a hun bei ahih manin mundang gam dang hong tung zolo in Pasian in a ma nungah Huhpa Kha Siangtho (KSTho hun-sepkhiat hun) hong sawl ta hi. Tu laitak pen Kha Siangtho hun ahih manin Kha Siangtho in mun khempeuh ah na sem kawikawi in kicing kawikawi hi. Pasian in a ki-imcip thusim te zong kong gen ding ci-in kamsaang Jeremiah tungah acih mah bang tuhun Kha Siangtho hun ah mitampi in thuthuk nono thei in kipil thei mahmah hi. Nidang in Kumpite leh Biakna makaite bek ii kep cing a thupite tu in mi khempeuh kiangah Pasian in pholakta hi. Tu hun ciangin a kidophuai thu khat ah “a ki-imcip zo thu” cih pen om nawn khollo hi. Tua pen Kha Siangtho nasepna hang ahihi.

Khat vei Pasian a kihei leh nisuah na lam mite’n (Asia) a maitang mu in, Nitumna lam te’n (America) a nung bek mu hi. Tua hi in First World te’ muhna leh Third World te’ Pasian muhna a kibat lohna pen a etna uh leh a kilak a kibatloh man ahihi. A muh dan uh maan tuak napi-in ngaihsut siamkei leh nang’a maan kei a kici thei ding ahihi. Pasian’ nung hei san kaal pen lungzinhuai mahmah khading hi. Lai Siangtho sungah Pasian pen zanni, tuni, a tawntungin kikheel ngeilo na ci hi, hih thu a maan mah ahihi. Pasian pen kikheel ngeilo a, kihei thei bek hi cih phawkhuai hi. A diak diak in Pasian’ kikheel ngeilohna pen a sunglam thu ahihi. Mi hingte pen isung leh ipua a kikheel baih mahmahte ihihi.